NBA籃球名宿米高佐敦（MJ）退役多時，但其復刻版波鞋Air Jordan XI Retro Concord面世後，仍然風靡全球，多個美國城市更爆發搶購大混亂，場面令人既震撼亦疑惑，為何一對波鞋竟有如此魔力？呢種現象無遠弗屆，除咗米高佐敦，仲有足球員碧咸，已故科技巨人喬布斯，佢哋成功之處在於同樣遭到神化，獲萬千民眾崇拜，義無反顧追捧。到底「神人」係點樣練成？
神人當然與眾不同，要令人覺得你超凡，就必須擁有戲劇性，甚至超現實事迹，米高佐敦、碧咸及喬布斯人生同樣大起大落，佐敦93年高峰期突然引退轉打棒球，舉世震驚，及後復出再創高峰。碧咸98世界盃由當時得令，最後慘成國家罪人，4年後再成英雄殺敗阿根廷。喬布斯創立蘋果公司，但被自己人踢出局，回巢後成功將公司起死回生。呢種極端反差，令人覺得佢哋能人所不能，屬於獨一無二，無法被取代，成為神人首要條件。
縱有神乎其技才能，但要真正進身神級，亦需貴人相助，運動品牌往往就係體育界「造神者」，佢哋善於包裝，除咗為運動員度身設計波鞋、衣服等產品，亦將佢哋打造成英雄、明星，加上市場推廣，將運動員影響力擴展至全球。整個「造神」成本高昂，但一旦成功，回報極可觀，Air Jordan系列產品至今每年仍為NIKE帶來逾10億美元收入。
講到尾，運動員本身亦要生性，必須長期保持身體健康，有足夠狀態比賽，米高佐敦打到40歲先至真正退休，碧咸現年36歲仍有心有力。佢哋運動生涯特別長，自然有更多時間建功立業，所造成嘅影響力更長久。神人足以改變世界，下一位神級球星，大家估吓又係邊個？