喜獲19.5億合約 戴歷羅斯High到反艇
【本報綜合報道】「毒玫瑰」戴歷羅斯上季力壓兩大「波神接班人」高比拜仁及勒邦占士，榮登常規賽MVP，想唔到「吸金力」亦逐步超越兩位前輩。據《ESPN》爆料，羅斯仔獲球鞋贊助商天價10年2.5億美元（約19.5億港元）贊助費，仲多過佢份頂薪波糧！羅斯荷包暴漲果然零舍不同，昨日喺「第1控衞大戰」中，光芒盡掩基斯保羅，領公牛作客大勝快艇114比101。
跑贏大帝高比仔
長江後浪推前浪，人氣愈來愈勁嘅戴歷羅斯近年已成為籃球迷新寵兒，其受歡迎程度絕不下於高比仔及「大帝」等球星，因此其球鞋贊助商為綁住隻「金蛋」，不惜出動天價續約。據《ESPN》透露，新合同為期10年，總值2.5億美元，意味羅斯平均一年獲得2,500萬美元（約1.95億港元），較其剛與公牛簽下嘅5年9,400萬美元波糧，足足多出一截。
此外，羅斯還打破了高比仔及「大帝」曾簽下嘅球鞋贊助合同，「小飛俠」曾簽下5年4,500萬美元贊助合約，而占士就簽過7年9,400萬美元合約，依家都畀「毒玫瑰」過頭。美傳媒仲話羅斯除具能力及星味之外，形象健康亦係佢一大優勢，所以吸金力超越高比仔同占士只係時間問題。
交足貨技壓CP3
戴歷羅斯昨日就要面對今季換了東家嘅「CP3」基斯保羅，上演「第1控衞」爭奪戰。「毒玫瑰」今場對住CP3毫無懼色，得分、助攻瓣瓣有，並射入全隊最高29分，交出16次助攻及8籃板，只差些少就做出「3雙」。雖然CP3表現亦唔曳，交出15分及14助攻，但公牛整體表現始終較勝一籌，最終勝利都係歸羅斯仔。另小牛及塞爾特人同日均贏波，兩支勁旅終在第4戰打開勝利之門。