對於持續不振十幾年的香港足運來說，在2011年終於隱約見到了一線曙光，由專家報告催生的「鳳凰計劃」，對港足未來勾劃出一個比較清晰和長遠的發展藍圖和路線，加上足總進行人事改革、旺角場重開、港甲視頻啟播和打氣Babies湧現，都大大搞熱球市氣氛，然而本港球圈積弱多年的問題又豈是一年半載可以解決，故「港足變鳳凰」的路肯定既漫長又艱辛。
香港球市陰乾十幾年，舊有價值經已所餘無幾，全賴幾位有心班主撐住，在資源緊絀下艱苦經營，終於捱到兩年前嘅東亞運，港隊奇迹奪金，政府順應民意拍板大力發展本地足球，接納改革顧問建議推行「鳳凰計劃」，令本地波出現一線生機。
2010年本地足球無大動作，來到2011年則見到本地足球明顯在轉變，足總經過修章後架構重整，出現頗多人事變動，新球季推出各類新政策，而甲組會亦配合大環境各師各法，出盡法寶吸引球迷注意，當中港甲打氣嘅Babies數量激增，更一度成為球圈熱話。
反而球迷最關心嘅香港代表隊，2011年絕對係令人失望，甚至可以話係痛心嘅一年，奧運會及世界盃兩項國際大賽外圍賽，大小港腳均絕早宣告行人止步，最令人不滿係足總同甲組會態度均漫不經意，以為請到CEO及外籍主教練，問題便會解決，球圈各個主事者如此敷衍了事嘅心態，對於香港足球絕非好事，而港足世界排名勁跌至169位，算是對港足營運不良的一種懲罰。
撰文：黃兆崑