熱火破綠軍N高上位
【本報綜合報道】邊個話熱火只得「3巨頭」？昨日呢支上屆總亞軍面對東岸勁敵塞爾特人，新秀諾里斯高爾在關鍵時刻搶晒一眾「巨頭」鏡，最後一節個人狂飆14分，協助熱火以115比107氣走「綠軍」，主場球迷立即向「N高」大呼MVP致敬，但其實今場只係佢人生第2場NBA賽事而已，至於有冇機會升呢成為第4巨頭，就要睇佢嚟緊能否持續呢種表現嘞！
第4節狂飆14分
熱火今場打出漂亮開局，在「3巨頭」帶動之下，上半場結束後大幅領先塞爾特人15分。不過「綠軍」就像剛過去嘅聖誕大戰一樣，下半場改變陣式以聯防抵禦熱火，令勒邦占士與韋迪難以硬闖取分，「綠軍」末節一度追貼至3分差距。
在主將突然失準嘅情況下，熱火幸得新秀諾里斯高爾挺身而出，第4節個人攻入14分，其中包括最後1分鐘一記跳投拉開分差，難怪在場熱火迷都大叫MVP，表揚呢位23歲新秀。熱火最後贏115比107，取得開季2連勝。
大帝讚佢有料到
其實全場攻入20分、4個籃板、4次助攻及3次搶截嘅「N高」，在今季選秀會只係以28位被公牛揀中，但輾轉間過檔熱火，絕非備受注目嘅新人。殊不知首兩場常規賽都交足貨，隨即成為炙手可熱新星，傳媒更譽佢為「熱火朗度」。「N高」賽後稱自己仍在成長中，而「大帝」勒邦占士及教練史普斯達都大讚佢心理質素強，新人都敢在關鍵時刻起手。「熱火3巨頭」今仗合共貢獻68分，其中「大帝」表現最佳轟入26分，至於塞爾特人輸波後慘嘗開季2連敗。
N高知多啲
國籍：美國
年齡：23歲
身高：6呎2吋
球衣：30號
簡介：諾里斯高爾喺今年選秀會以首輪第28位被公牛揀中，然後被送到木狼再輾轉過檔熱火。佢讀書時文武雙全，打波叻之餘讀書仲勁，以高中資優生身份入讀克里夫蘭州大學並已完成健康科學系學位，佢亦係NFL名將特倫特高爾（Trent Cole）嘅堂弟。
熱火4人幫今仗數據
勒邦占士 26分6籃板5助攻
韋迪 24分1籃板8助攻
保殊 18分11籃板1助攻
諾里斯高爾 20分4籃板4助攻