湖人乘勇狙擊紐約人
【本報綜合報道】湖人成功阻止開季3連敗嘅尷尬局面，昨日以96比71大炒爵士，打開勝利之門。由於「紫金兵團」早早奠定勝局，所以帶傷高比拜仁能提早休息，今場僅上陣30分鐘左右，聽朝主場對紐約人，有權乘勇再勝！（now 635及廣東體育周五早上11時30分直播）
抖夠兼有主場之利
開季2連敗嘅湖人今場表現得十分集中，主將加素今役貢獻5記封阻及2次搶截，令爵士在頭3節單節得分均未能超過20，結果輕鬆獲勝，帶住手部傷患嘅高比仔亦因而提早休息，減輕傷患惡化。湖人連賽3日後，戰罷爵士總算可以抖番日，所以明早可以養精蓄銳戰紐約人，後者則要在今早展開作客之旅，體力肯定不及湖人。
高比仔搵到新老婆
高比仔透露過唔會被婚變影響心情，梗係啦！佢早前已經搵到「新老婆」，斥資約38萬美元（約300萬港元）購入啞黑色全新林寶堅尼LP700 Aventador，開季後仲日日揸住佢去比賽，難怪有網民話佢已經由「小飛俠」變成「蝙蝠俠」了。