洛城打吡輸波出晒醜
【本報綜合報道】近期飽受婚變、離隊傳聞困擾嘅高比拜仁，狀態果然「麻麻哋」，首場季前賽「洛城打吡」上陣30分鐘竟造出全場最高7次失誤，明顯心不在焉；反觀大換血嘅快艇朝氣勃勃，兩大新兵基斯保羅及比立斯正選上陣都交到貨，「雙控衞」陣式試驗合格！
CP3比立斯交到貨
今場「洛城打吡」焦點落晒喺CP3基斯保羅身上，事關佢原先已投湖人懷抱，可惜被聯盟煞停後輾轉加盟同市宿敵快艇。CP3今場同老將比立斯一齊正選上陣，兩人都表現不俗，CP3上陣24分鐘交出17分、9次助攻、7個籃板及5次搶截，表現光芒四射，而遷就CP3變相起手較多嘅比立斯，則僅上陣20分鐘，但已貢獻23分，其中三分球6射4中，夠晒對辦。
相反湖人嘅狀態明顯被比下去，頂替費沙打正選控衞嘅比力克未夠級數，未能為球隊好好鋪橋搭路，領袖高比拜仁雖然貢獻22分，但亦造出全場最高7次失誤，甩甩漏漏令人失望，結果湖人以95比114大敗。
另方面，上季為小牛奪得總冠軍嘅老將史杜積高域，以及馬刺老將麥戴斯尋日分別宣布退役。