高比（界）Kim洛城熱話
【本報綜合報道】身家豐厚嘅洛杉磯湖人高比拜仁離婚已成事實，意味呢個「另類筍盤」將會重投市場，根據美國的八卦網站《Mediatakeout》爆料，高比仔前隊友奧當，率先為視星「家姐」Kim Kardashian「鋪橋搭路」約高比仔見面，所謂姣婆遇着脂粉客，「小飛俠」得悉後已答允赴會，一向愛出風頭嘅Kim，因而有機會由「大茄」堪富利斯前妻，升呢做「高女郎」！
高比仔同奧當一向私交甚篤，早前奧當被湖人逼走，即傳出高比仔向球會洩憤罷操，可見兩人感情要好，有指高比仔兩個月前已搵奧當「Man Talk」訴苦，狂呻同雲妮莎婚變一事。
奧當見好兄弟最近死晒狗，於是第一時間做嘢，介紹佢老婆Khloe嘅二家姐，即係《真人騷》女星Kim Kardashian畀高比仔認識。有傳Kim一直都對高比仔有好感，所以上季經常扮陪妹睇奧當比賽，查實就係偷（界）高比，睇吓有冇機會埋身。其實奧當都唔係亂咁做雞仔媒人，多少因為佢熟悉老友「口味」，知道「小飛俠」一向鍾情嬌小玲瓏兼身材出眾嘅女子，所以先「推薦」「家姐」畀佢。
被笑着奀星「舊鞋」
事實上，奧當確係心水清，高比仔一聽到係Kim Kardashian個名立即應約，答允同呢位５呎２吋前「ＮＢＡ ＷＡＧ」見面。其實Kim同高比仔一樣都係啱啱離婚，佢同剛被籃網裁走嘅「大茄」堪富利斯結婚七十二日，就在今年十月離婚，成為娛樂界笑柄。不過消息傳出後，有不少網民揶揄貴為當代「波神」嘅高比仔，竟着冇班落嘅堪富利斯「舊鞋」，嘲笑佢冇眼光。