高比仔鬧完老細怒射3分波

260秒狂入67球

對於聯盟煞停CP3加盟湖人一事，高比仔昨日終於忍唔住開腔炮轟一眾「老細」：「作為球員，我哋一直努力奮鬥，但老闆們就只懂為利益而不斷吵鬧，停擺就因為咁而發生！我知道若然基斯保羅加盟湖人，其他老闆一定唔高興，佢哋唔想見到湖人再多一個偉大球員，所以就叫停交易，完全係老闆們嘅內部鬥爭。」

雖然高比憤怒了，但「飛俠」昨日仍回歸賽場操練，未有再鬧情緒缺操，而且更將怨氣化成動力，狂射3分球發洩。佢昨日喺短短260秒內起手86球3分球，並入咗67球，命中率驚人地高達78%，難怪連新加盟湖人嘅前3分王卡邦奴，都睇到目瞪口呆。

另一邊廂基斯保羅出席快艇記招時，就透露過去幾周十分難過，因為自己只係單純想打波而已，故落實轉會總算令佢放下心頭大石，而選擇加盟快艇，主要因為球隊具備奪冠條件。此外CP3亦承諾會為快艇執行埋最後1年合約，唔會在明年夏天跳出合同，意味呢位「前蜂王」將至少留効快艇2季。