「蜂王」基斯保羅終於逃離「蜂巢」！兩次煞停「CP3」轉會嘅NBA總裁史端終於讓步放人，令基斯保羅如願轉投洛杉磯快艇，與格芬組成「恐怖2人組」。快艇近年一直被同市宿敵湖人食住，如今有「助攻帝」聯手「入樽王」，有望扭轉多年被「紫金兵團」食住嘅局面。
去意已決嘅CP3原先一心過檔湖人，但卻被史端煞停，到日前想轉投快艇，又被呢位「麻煩人」阻撓，幸好快艇昨日宣布將射手艾歷哥頓、二年生阿美奴、中鋒卡文及一個2012年首輪選秀送到黃蜂，終換取心儀已久嘅星級控衞基斯保羅。
CP3上季平均每場貢獻15.8分及9.8次助攻，得到呢位助攻能手加盟，「入樽王」格芬定必如魚得水，再加上新簽嘅老將比立斯，快艇勢成新季NBA最矚目嘅球隊之一。由聯盟託管嘅黃蜂尋日開記招證實交易，史端表示：「我們做了一筆很好買賣，黃蜂的前景非常美滿，我相信明年上半年便會有買家收購球隊，並繼續留守在新奧爾良。」
適逢今年NBA停擺，不少高質小將均延遲踏足NBA，讀多一年大學，故來年選秀會勢必湧現大批超新星，手執2個2012年首輪選秀權本錢在手嘅黃蜂，前景確實一片光明，表面睇會屬一個雙贏局面。
快艇多年來都被湖人食住，如今竟搶走對方垂青已久嘅CP3，確實有望取代年事已高嘅湖人，做「LA一哥」。
大前鋒 格芬
前鋒 卡朗畢拿
中鋒 迪安迪佐敦
後衞 莫威廉士
控衞 基斯保羅
第6人 比立斯
本報綜合報道