劉凱濤樂做保險高人
睇開甲一籃球嘅球迷都知福建「長人」劉凱濤（阿濤）高高瘦瘦，但身手敏捷籃底「玩晒」，不過呢位2米04嘅港隊中鋒近日改穿西裝，進軍保險界。阿濤希望唔使靠高度拉客，以真心打動客戶，畢業後成為全港最高嘅保險從業員！
「高」不可攀易識新客
在理工大學專上學院就讀財務及投資策劃高級文憑二年級嘅香港籃球代表劉凱濤，今年暑假起因為實習踏上保險經紀之路，轉眼間已經幾個月，他笑稱有時連客人都會被他身形嚇倒。「有時約客人出嚟傾，佢哋會話『嘩，乜你咁高嘅？』不過傾合約時都係坐喺度傾，所以唔會有咩唔方便。」
平日出街都要彎低身避廣告牌嘅阿濤，笑稱身高反令他多咗客源：「我哋有時會在街上做問卷，認識新客戶，街上啲人見到我咁高走近佢哋，亦會停一停步聽我介紹，反而更容易搵到新客人。」
自小對保險行業有興趣嘅阿濤，卻拒絕以突出身形做賣點，反而希望做到以客為本，推翻一般人認為「保險佬」hard sell嘅誤解。不過，着特大Size西裝及15號超大皮鞋，曾一度難倒阿濤，佢話每次買皮鞋都要「撞彩」：「皮鞋唔係每次都買到，西裝亦要訂造，幸好返工前剛巧有朋友見到有間鞋舖有15號鞋賣，通知我及時買到，都算好彩。」阿濤計劃完成最後一年高級文憑課程，然後升讀學士，同時繼續業餘喺保險界向「高」發展！
認識劉凱濤
年齡：20歲
就讀院校：香港理工大學專上學院
修讀課程：財務及投資策劃高級文憑
効力球會：福建，亦為香港籃球隊代表
圖／文：徐飛、Vien