踏入冬天，部分香港球場嘅草地質素變差，樂比仔早前去深水埗球場睇深水埗對傑志嘅比賽，發現球場好多地方都唔平坦，先唔計球員容易受傷，香港球員長期喺呢啲球場比賽，搞到成日獨沽一味斬高波，因為佢哋連攞腳波，甚至正常傳球都有困難，每傳多腳波風險就愈大，搞到比賽質素嚴重下降，睇波嘅球迷當然冇癮。
記得八十年代睇英國波，當時普遍英國球場嘅質素都好差，主要原因係英國成日落雨，球場保養又冇依家做得咁好，小禁區內一定係寸草不生，所以英國球隊嘅踢法亦習慣高Q大棍，技術含量甚低。
但隨着科技進步，球會有更好財力保養球場，依家外國嘅球場全部綠草如茵，「巴塞足球」亦都喺呢個環境下稱霸世界，換轉係二、三十年前，巴塞隆拿冇可能好似依家咁勁，因為佢哋喺薯仔田比賽下威力大減，仲點會有悅目組織？隨時喺「槍淋彈雨」下畀對方嘅手榴彈或高空波屈死。
香港足球想進步，首先就要搞好個球場，雖然政府近年已改變策略，主力興建人造草球場，希望減少草地嘅損耗，等本地球員可享受喺地上踢波，但人造草場始終唔係國際球壇主流，甲組比賽場地亦全部用真草，所以要提升香港足球水平，首要任務就係搞好球場塊草地先，個場都搞唔掂，又點樣提升水平呢？
波男