【本報綜合報道】基斯保羅改投快艇，意味「無啦啦」放走奧當嘅湖人突然「雙失」，成為近期ＮＢＡ轉會窗嘅大輸家！陣中王牌高比拜仁雖然大方祝賀同市球隊快艇奪得心頭好，但昨日卻突然缺席操練，擺明係對高層嘅交易政策作無聲抗議。
湖人上季失落錦標已證明球隊有增兵需要，殊不知「紫金兵團」爭唔到ＣＰ３之餘，又無故放走第六人奧當，難免令高比仔大感不滿，並缺席了昨日上午嘅操練。由於主帥米克布朗未有披露高比仔有何傷病，因而令人估計「小飛俠」係鬧情緒抗議。
湖人仲有一個壞消息，就係另一收購目標杜域侯活盛傳與籃網好事近，《ＥＳＰＮ》透露籃網會拉埋拓荒者與魔術作三方交易，籃網除奪「魔獸」之外，亦願意接收魔術兩大高薪隊友杜漢同陶告魯，吸引魔術放人。至於另一爭標分子公牛則成功羅致活塞名將咸美頓。
雖然高比仔鬧情緒，但《福布斯》剛公布了ＮＢＡ新季10大最高薪球員，高比仔仍以2,520萬美元年薪居首，第2位則係巫師「毒瘤」劉易斯，年薪為2,210萬美元。不過因ＮＢＡ今季減少了場數，故球員只能領取80.5%嘅人工。