對於現今嘅NBA球員嚟講，紋身就等同你在手機裝whatsapp一樣，比冇還要普遍。不過八、九十年代邊有呢支歌仔唱，紋身、染髮、穿環等行徑被視作反叛，代表人物當然首推「小蟲」洛文。轉眼間「壞孩子」已變成50歲熟男，但洛文仍遊戲人間蒲夜場捽碟做DJ，又創立品牌出潮Tee，只願一生不「退潮」！
早在八、九十年代已紋到成身公仔，染到個頭五顏六色嘅洛文，絕對稱得上係NBA潮人始祖！佢今年剛好踏入「五字頭」，但年齡完全無阻「壞孩子」繼續走在潮流尖端，佢近年愛上捽碟做DJ ，經常飛到世界各地夜場同年輕人打成一片，上月尾去咗哥倫比亞，同另一DJ Vic Latino孖住開騷。據悉洛文打碟時最愛咬住支大雪茄，招招積積辣慶個場，後生仔見呢位「名叔」咁鬼寸都話Buy。除捽碟外，原來洛文唱歌亦有一手，佢把磁性沙啞聲線，似十足組合動力火車一樣，因此「壞孩子」近年不時獲邀出騷大展歌喉。
洛文出道以來被指標奇立異，有人覺得佢奇裝異服，亦有人欣賞佢着衫有態度具個人風格。洛文品牌潮Tee Rodman Ink上年正式面世，圖案大多包含性感美女，貫徹佢「壞」嘅風格，而洛文在品牌網頁上亦親身上陣做埋Model，身形冇走樣，一啲都唔似5張嘢。
私生活方面，洛文一生女伴多如繁星，同麥當娜的情史亦為人津津樂道，有人覺得佢好花弗，但亦因為佢試得多先知道自己需要啲乜，結果現任妻子Michelle Moyer終於能夠讓「壞孩子」停下來，自99年拍拖後走在一起已經12載。洛文近年會帶埋老婆一齊出席活動，另外還會在Twitter上載恩愛照片，同粉絲分享生活點滴。
同時佢仲係一個好爸爸，鍾意同妻兒共享天倫。至於同首任妻子所生嘅女兒Alexis，如今已經係一名亭亭玉立嘅美少女，洛文同愛女一向以朋友關係相處，實行做一個出位潮爸。
年齡：50歲
位置：大前鋒
球會：活塞、馬刺、公牛、湖人、小牛
威水史：5屆NBA總冠軍、7屆籃板王