自從塞爾特人在07年夏天找來加納特與雷阿倫夥拍皮雅斯，重組「綠軍3巨頭」獲得空前成功之後，近年NBA列強都爭相倣效，隊隊都話要組織「3巨頭」嚟衝冠！上季無法完成3連霸嘅湖人，隨着積遜教練退休，今季亦準備置之死地而後生，嚟一次大換血，誓找兩位「巨頭」來輔助高比拜仁，以抗衡熱火嘅3巨頭。
無可否認，組織「3巨頭」已成為NBA列強近年嘅組軍大方向，熱火在去年夏天就成為轉會市場大贏家，搶得勒邦占士及保殊兩員猛將聯手韋迪，隨即由中游分子搖身一變成為爭標大熱。另外紐約人、公牛等球隊亦已各自砌出3巨頭雛形，上季成績亦有顯著進步。
眼見列強日益壯大，湖人今季亦決定套用「3巨頭」方程式，誓搶「蜂王」基斯保羅（CP3）同「魔獸」杜域侯活，加埋陣中王牌高比拜仁，再創王朝。
雖然NBA總裁史端早前煞停湖人、黃蜂同火箭嘅三方交易，令CP3未能如願投湖，但昨日有消息指聯盟已重新讓黃蜂與其他球會作出談判，據悉，3支球會亦已重新商討交易，加上球員工會主席費沙表態會撐CP3，唔排除就事件起訴聯盟，故湖人仍有機會斟得CP3加盟。
至於另一目標杜域侯活，其經理人昨日亦透露，「魔獸」已獲得魔術「開綠燈」，與籃網、湖人及小牛就轉會談判。眾所周知「魔獸」一直希望行奧尼爾舊路，從魔術過檔湖人夥拍高比仔，所以投効湖人成數始終最高。再者魔術已率先裁走「狂人」亞連拿斯，重組決心堅定，睇怕「魔獸」離隊只屬時間問題。
另方面，紐約人已棄用比立斯，並成功簽入小牛上季奪冠功臣贊特拿，聯手「A米」同安東尼合組「3巨頭」，而「玻璃腳」麥基迪則已改投鷹隊。至於年僅27歲嘅拓荒者射手萊爾，就透露因受長期傷患困擾，正考慮退役。
本報綜合報道