有時睇直播波，見到球證亂咁判、球員做戲插水真係好忟，如果你手揸個遙控器，見到唔順眼就電佢哋，係唔係好正呢？近日挪威電視台就滿足球迷夢想，搵到班前挪威國腳踢咗場波，於佢哋大髀上戴上通電裝置，節目主持人可隨時撳掣電到班球員跳舞，好鬼過癮。
今次賽事好認真，邀得前英超球員卡爾科托夫、布軒倫、龍迪雲同米列等出席，個個都戴上一條通電黑帶，平時呢個裝置係用嚟訓練狗隻，估唔到今次用來電人。睇佢哋落到場被電到𠵱嘩鬼叫，連球證都未能幸免，觀眾當然睇得過癮，球員亦玩得好開心。