地獄賽程 攞綠軍命

【本報綜合報道】受停擺影響下,新一季NBA常規賽將會縮水至66場,並鎖定於美國時間聖誕節(香港時間12月26日凌晨)開打!各隊要在119日完成66場賽事,聯盟昨日公布新球季賽程可謂大考球員耐力,每隊都會遇上連續三日有比賽嘅「地獄賽程」,其中有份打開鑼戰嘅「綠軍」塞爾特人最無奈,四月中要硬撐6日5賽,一班老將未必頂得住。

持續五個月嘅停擺令常規賽由82場減至66場,新季賽程亦變得密密麻麻,本月17日展開嘅季前賽會率先縮水,列強只打兩場熱身賽,而且對手亦只係鄰近球隊,從而造就湖人與快艇在開咧前合演兩場「洛城打吡」。

塞爾特人6日打5場

面對新季賽程安排,最無奈肯定係塞爾特人,「綠軍」先要以4日3賽迎開咧,開鑼戰硬撼紐約人後,再對熱火及黃蜂,到四月中更要面臨6日5賽嘅「魔鬼賽程」,而季尾27輪常規賽中更有18場係作客,要知道「綠軍」近年有「老人院」之稱,平均年齡高達35歲,加納特、雷阿倫及皮雅斯幾位老兵好難打足整季賽事。

雖然塞爾特人爭冠任務艱巨,去季亦無緣東岸季後賽決賽,但新一季依然備受關注,足足有31場比賽透過4大電視轉播商作全美直播,比湖人嘅29場、熱火嘅27場及上季盟主小牛嘅26場還要多,至於魚腩騎士則僅得1場全美直播,少咗「大帝」後繼續遭受漠視。

每月焦點賽事

DEC

日期(香港時間) 賽事(前者主場) 看點

12月26日 小牛對熱火 聖誕大戰,上季NBA總決賽翻版。

12月26日 雷霆對魔術 可能係杜域侯活最後一次為魔術打聖誕大戰。

12月27日 魔術對火箭 徹徹底底沒有姚明後嘅火箭會打成點?

12月28日 熱火對塞爾特人 今月最矚目東岸大戰。

JAN

日期(香港時間) 賽事(前者主場) 看點

1月15日 爵士對籃網 迪倫威廉士重返鹽湖城,料噓聲震天。

1月17日 湖人對小牛 湖人上季季後賽遭小牛橫掃,復仇味濃。

1月26日 湖人對快艇 洛杉磯打吡,睇格芬入樽。

1月30日 公牛對熱火 上季東岸決賽翻版,亦可能係今季前哨戰。

FEB

日期(香港時間) 賽事(前者主場) 看點

2月10日 塞爾特人對湖人 傳統大戰,球迷必看。

2月17日 公牛對塞爾特人 東岸大戰「毒玫瑰」單挑「四大天王」。

2月18日 騎士對熱火 「大帝」重返母會,騎士迷又有機會「熱情」招呼。

MAR

日期(香港時間) 賽事(前者主場) 看點

3月5日 湖人對熱火 「新波神」大戰,「大帝」再戰高比仔。

3月12日 湖人對塞爾特人 屆時轉會窗已關,高比仔好可能有新隊友衝冠。

3月18日 小牛對馬刺 德州打吡,特別激烈。

3月30日 熱火對小牛 小牛上季在此初嘗冠軍滋味,熱火誓阻佢哋重溫美夢。

APR

日期(香港時間) 賽事(前者主場) 看點

4月2日 雷霆對公牛 上季MVP戴歷羅斯大戰得分王杜蘭特。

4月21日 馬刺對湖人 兩支傳統西岸勁旅較量。

4月27日 鷹隊對小牛 常規賽煞科日戲碼較強賽事。