嚴守4大守則!

上季開始本地足球出現打氣寶貝,看台上經常有美女亮相,令現場氣氛升溫,很多人誤以為立奧美只係公民其中一個Babe,但佢強調「球迷會經理」職位絕非虛銜,皆因此項工作必須嚴守四大守則,唔係咁易做o架!

1.衣着要端莊,嚴禁賣弄性感!

立奧美話,會方要求球迷會經理嘅形象必須正面,衣着盡可能唔好太「清涼」,以真誠態度吸引球迷加入球迷會,打氣Babies可以穿露臍同低V,立奧美就唔可以。

2.注意自己言行,嚴禁罵人!

很多人一行入球場就情緒大釋放,大叫大喊,但立奧美就要保持清醒,因為佢係啦啦隊嘅領袖,為球隊打氣就已足夠,遇到球證誤判、對方球迷挑釁,都要沉住氣。

3.打扮要淳樸,嚴禁標奇立異!

立奧美來自模特兒界及娛樂圈,化妝扮靚係佢專長,要幾前衞有幾前衞,但如果佢着到全身閃晒入場,恐怕球迷未必接受得到。

4.要懂避忌,嚴禁與球員過分親密!

立奧美仲未有男朋友,佢美貌兼性格豪爽,好快就同球員打成一片,佢話好明白會方定下此戒條嘅用意,因為同球員太親密,對球會形象同球迷會工作都會有不良影響。