公民球迷會經理Naomi翻版大頭妹

立奧美話，有幸成為公民球迷會經理，當中有一番機緣巧合，佢話：「我同公民班主係朋友，一次聚會中知道佢哋想搵一個球迷會經理，然後找來一班女仔面試，但係冇人過到關，原來應徵者要答一個好簡單嘅問題，但就冇人識答，於是我去試試，原來佢哋問：『咩嘢係越位？』真係好簡單喎。」

球場內外一腳踢

球迷會經理嘅工作，有點似《足球小將》內嘅「大頭妹」，立奧美話：「我係球隊啦啦隊嘅領袖，比賽期間要幫球員打氣，亦要兼顧球場外嘅工作，例如喺facebook與球迷互動，收集意見，有活動時就要負責做組織及聯絡工作，如果有贊助商或傳媒想搵班主同球員，我都要幫手聯絡。」

大頭妹最終成為戴志偉妻子，不過立奧美就話唔會同球員拍拖，只會以欣賞角度去睇公民球員：「公民球員個個都好有型，最有型係黃耀富、最靚仔係羅振邦、最好波係迪天奴、最成熟係謝德謙。」立奧美話，會透過自己喺娛樂圈同模特兒界嘅人脈，幫公民球員搵贊助同拍廣告：「希望讓人知道，我係真心為球隊好，如果能夠幫到佢哋，我嘅工作才算做出成績。」