天水圍屯門學生妹沙欖撻出癮！
全女子沙灘欖球有得玩喇！欖球在港一向有捧場客，撞式、非撞式，各適其適，最近連女子沙欖都開始大力推廣，以華將當家嘅天水圍飛鷹正是其中一支本地球隊。由草地鬥到沙灘，究竟有乜咁好玩？等呢班年輕女將話你知！
香港以往都試過辦沙灘欖球賽事，不過係男子或男女子同場舉辦，專屬女子今次乃第一次。平均年齡約15歲嘅天水圍飛鷹女隊，由就讀天水圍和屯門等地區學校嘅學生組成，早前參加「Art Futures Group全女子沙灘欖球節」勇奪19歲以下組別銀碗、16歲以下組別銀盾錦標。雖然「撻」到滿身泥沙，部分隊員更帶傷而回，但一班女生仍大呼「好玩」。
難玩過草地欖球
事實上，沙欖仍未納入正式賽事，故在港未有一套標準規則。天水圍飛鷹教練羅遠輝大談沙欖同傳統欖球分別：「沙欖基本上場地比較小，可能10步就到對面。今次賽事限每隊6人出場，不設『鬥牛』，出界碰一碰球即開，達陣逐分計，亦冇得益球。在沙上跑動比在草地更用力，球員落地可能會『食沙』，而且較易受傷，所以絕對更具挑戰性。」
玩得開心，辛苦都冇所謂。本身有武術底子、被隊友稱為「女俠」嘅王雪盈，笑言「功夫」可派上用場：「可能因為本身有習武，馬步穩，玩起沙欖時不容易被推跌。當然，沙欖很具挑戰性，再有機會都會參與！」在香港，由於場地和季節所限，要辦沙欖賽絕不容易。不過，香港欖總和個別球會計劃每年都舉辦至少數次同類賽事，希望人人都可在沙灘「達陣」！
圖／文：Vien