飛馬踢少個照贏南華

首個入球出現喺二十分鐘，南華中場李海強招牌罰球勁射，省中對方球員改變方向入網。換邊後冇耐，飛馬即刻扳平，當時倒戈嘅卡里祖右路個人表演，避開南華後衞射成一比一。五十四分鐘，卡里祖被南華中堅祖爾拉跌，伊達主射十二碼為飛馬反超前。

雙方埋牙杜特被逐

落後嘅南華派出「陳七」陳肇麒落場，成為衝突嘅導火線，當時飛馬門將高田壽典攞波，被南華嘅蘇沙撞出底線，但球證卻判角球，之後兩隊球員發生碰撞，陳肇麒先向杜特郁手，杜特出拳還擊，蘇沙亦趁混亂篤高田壽典塊面，但球證卻只向杜特出示紅牌，其餘高田壽典、蘇沙及「陳七」都係黃牌，令飛馬球員大感不滿。

陳肇麒涉嫌先向杜特有行動，該名飛馬中堅不甘受辱而還擊。	陳肇麒遭侵犯後在球證面前痛苦慘叫。	球證吳超覺（右）只向杜特一人出示紅牌，惹來主隊球迷瘋狂噓聲。

賽後飛馬教練陳曉明表示，今次混亂肯定有球員唔啱，佢會親自向杜特了解，但據球員所講，係對方郁手在先。飛馬會長王威信對贏波表示高興，因為今次係飛馬第一次喺聯賽正式贏南華。