自從在世界田徑賽被宿敵羅保斯「打手」斷送金牌後，中國「欄王」劉翔學精咗，決定針對性加強身體Power，在美國特訓期間還請來「特別教練」協助，兼且跑山狂操，實行要做個唔再畀人恰嘅大隻仔！
所謂經一事、長一智，劉翔今年世界賽被羅保斯出茅招阻止，令佢立定決心加強力量，所以今趟去美國進行三星期特訓及檢查期間，佢就邀請1995年美式足球MVP教佢做Gym，有高人相助嘅佢仲喺微博上高呼受益不淺。
除此之外，劉翔同隊友史冬鵬更在教練孫海平設計嘅魔鬼訓練中，進行跑山鍛煉體能，日前佢哋就去咗離酒店不遠嘅山作越野跑，可以一邊跑山一邊睇風景，一向貪玩嘅「欄王」覺得係優差，跑足兩個鐘「感覺好爽」咁話。