和富大埔喺滬港球會盃次回合慘敗七個一皮，有老友問波男，中港兩地水平係咪差得咁遠？當然，我哋唔能夠單憑一兩場波嘅賽果就亂下判斷，但客觀地睇，就算係中甲球隊，班費動輒都三、四千萬元人民幣，係六百萬港元班費嘅大埔幾倍，實力凌駕港甲球隊之上亦好正常。
記得以往中港球隊交鋒，雖然都係內地球會佔優，但都唔會好似今次咁一面倒，不過波男覺得做人要向前望，唔可以吓吓緬懷過去，如果樂觀啲睇，大埔今次輸波唔係壞事，起碼透過今次嘅滬港交流，知道自己嘅不足，第時大埔如有機會參戰亞協盃，今次累積嘅經驗隨時大派用場。
波男好欣賞大埔嘅搞波方針，佢哋係一支相當有遠見嘅球隊，好似季前拉隊到泰國集訓，同多支泰超球隊交手，就睇得出佢哋嘅決心同國際視野，雖然戰果都係輸多贏少，但香港足球想進步嘅話，就唔能夠故步自封，多啲同外隊交手，先至可以真正進步。
總結今屆滬港球會盃，都唔係話冇可取嘅地方，起碼兩回合都有電視直播，首回合大埔主場有超過一千八百名球迷入場，場面尚算熱鬧，最緊要係其他球隊唔好畀今屆賽果嚇窒咗，下屆努力啲，一樣有機會將獎盃帶返香港o架！
波男