本地甲組聯賽於後天（周五）重燃戰火，在之前超過兩星期的休戰期間，大部分球員由於球隊沒有正式比賽，故除出席球隊的晨操晚練外，都會自動自覺去健身或跑步，務求本地波重開之日可以盡情騷料。不過，其中一位日之泉JC晨曦的球員，卻另有特別任務在身，就是與未婚妻飛赴日本拍攝婚紗照。
說到這裏，相信各位球迷也會估到，所指的正是將於明年6月12日成家立室的梁子駿。「我當初都有擔心過，會方會唔批准我請假，畢竟除非有咩特別事，都好少會喺季中請假。好彩教練列卡度一早安排咗喺踢完場銀牌八強首回合之後，會放球隊三日假，我就再額外請多兩日假先成到行，真係好多謝會方『放過我』！哈！哈！」
為讓未婚妻可以有更多美好回憶，「子駿」選擇了位於東京市郊、景色既優美又浪漫的輕井澤作為拍攝地點。「其實四日入面影咗好多，不過負責嘅攝影師話仲差少少後期製作，所以只可以畀幾張大家睇住先，我老婆係唔係好靚呢？」
歡樂時光過得特別快，本地波重開後，晨曦將會硬仗連場，尤其是本周六作客對和富大埔的聯賽，勝負將關乎爭標形勢，故自日返港起，「子駿」已心無雜念備戰：「雖然27號會有場銀牌次回合都係對大埔，但如果比較起嚟，聯賽似乎重要好多，所以我同其他隊友一樣，預咗星期六要搏老命，大家一定要入場支持我哋呀！」另外，「子駿」特別為會方舉辦的「座枱月曆設計比賽」作呼籲：「個比賽冠軍獎品好豐富！我唔識設計亦冇乜藝術細胞，如果您有呢方面嘅專長，就唔好錯過呢次機會，快啲參加啦！」
文：戴陶蔚
相片由梁子駿提供