街邊打波遇伯樂
Vincent回想自小的發迹地，竟是父母開設的印尼餐廳門口的小巴站，他坐在餐廳內說：「4歲時爸媽開了這餐廳，每天放學我為咗等佢哋收舖，就喺門口同爸爸打起羽毛球，一打就上癮，一拍就拍到3年級，個波愈拍愈遠，最後畀小學老師睇中選入校隊，至接受正規訓練。」
抗拒「林丹殺手」別號
Vincent所指的餐廳門口只不過是一條狹窄行人路，卻盛載他與羽毛球的綿綿回憶：「細個喺門口打波打到全條街都識我，試過將個波打上小巴頂，要等小巴開車個波吹返落地先執得番，有時我仲會打打吓波衝上等客小巴同司機叔叔Say個Hi。」
這位「太子爺」自小練波後都會在餐廳大歎青檸梳打及牛尾湯飯補一補：「細個次次練完波，一定入嚟食呢兩樣嘢，仲有炒通菜啦。」不過，這片Vincent兒時樂土將於下月因觀塘重建而搬遷，他希望父母辛苦19年後先放個長假才再「復工」。
打波打到「紅」遍觀塘區，還是因為上月當上「林丹殺手」。丹麥超級賽擊退林丹，全職生涯第2次殺入成人賽8強，「紅」到訪問當天更有街坊走進餐廳大叫：「叻仔！林丹都贏到！」一戰成名的Vincent卻討厭「林丹殺手」這個新別名：「我唔鍾意呢個稱呼，因為我知道贏係因為僥倖，佢當日並冇盡全力跟我比賽，有一天，我希望佢會喺大型比賽以真功夫對付我，我至知自己同佢嘅距離有多遠。」
Vincent要再次挑戰林丹，機會近在眼前，佢今日首圈只要擊敗日本球手上田拓馬，明日次圈將有機會撼「超級丹」，Vincent希望盡全力，喺主場讓球迷見證「真殺手」本色。