旺角場重開嘅外隊重頭戲，除咗俄羅斯U19嗰場友賽，再數落去就係本年度省港盃，波總拍板，賽期係首回合12月28日喺旺角場踢夜波，次回合明年1月1日喺惠州上演，香港方面將會派香港隊，廣東方面亦放出風聲，會用廣東U19迎戰。其實有關今屆賽事詳情，官方暫未有正式公布，但係省港兩地球迷消息靈通，已經掌握唔少資料。
首先係關於上屆結束後，有人提出今屆「各出25萬對賭」嘅建議，據講呢件事暫時Hold住，因為今屆賽事支出由邊個負責仲未定。過去33屆省港盃，賽事支出一向都係由波總最高話事人負責，但今年「鳳凰計劃」出台，領導層已經執晒位，省港盃條數究竟邊個孭，就要搞清楚先得。
另據廣東球迷所得線報，廣東隊今年唔會再派中甲嘅廣東日之泉。賽事安排喺惠州舉行，估計會派出由郭億軍主持嘅廣東U19出戰，皆因省足協多年來都有一個不成文慣例，就係當廣東青年隊將滿19歲時，就會代表廣東參加省港盃。
由於廣東U19實力未足，因此可能會向東莞、日之泉及恒大徵召球員作補充，但主要目的都係檢閱年輕球員表現，若然真係咁安排，上屆開出嘅「25萬賭約」相信就好難成立，都係作罷居多啦！
波男