做人最緊要唔好忘本，唔飲水思源盞犯眾憎！Daniel我一直視「ＮＢＡ波神」米高佐敦為偶像，但佢成為山貓班主後，竟然大肆打壓球員，堅持球員唔應該搵咁多，直接令新一輪ＮＢＡ勞資談判破裂。球員被逼入窮巷群情洶湧，聯同美國傳媒齊齊炮轟「波神」卑鄙、貪婪、忘恩負義！
新一輪談判昨日展開，聯盟調解員科恩就收益問題，定為49％至51％之間嘅浮動提案，但勞資雙方傾咗8粒半後，依然得個吉。ＮＢＡ總裁史端躁爆咁話，如美國時間本周三前勞方唔接受新提議，將會硬性將佢哋收益下降到47％。
據美國傳媒透露，談判再次破裂關鍵在於山貓班主米高佐敦態度強硬，佢認為球員應該只收取37％收益，成為阻礙ＮＢＡ重開嘅元兇。美媒炮轟米高佐敦行為忘本、卑鄙及貪婪，好多球員都透過Twitter喪插「波神」，其中巫師射手歷克楊最激動，除咗咒米高佐敦落地獄外，更聲言罷着佐敦牌波鞋！
ＭＪ一向都係籃壇Icon人物，亦係萬千美國青少年嘅偶像，今次事件肯定令佢形像插水，認真係千年道行一朝喪。