錦織圭爆大冷贏祖高域

日本有好多「足球小將」震驚世界,依家仲出埋「網球小將」!世界排名只係120嘅男子網球手錦織圭喺瑞士室內網球賽四強戰,爆大冷以盤數2比1反勝世界一哥祖高域,勇闖決賽。

21歲嘅錦織圭只係持外卡參賽,而且第一盤先輸2比6,但第二盤驚險贏7比6,最後一盤更以6比0勝出,令今年瘋狂贏波嘅頭號種子祖高域遭到第四場失利,由於「扮嘢祖」有兩場係佢因傷退出,另一場輸畀費達拿,凸顯錦織圭今次贏波實在難能可貴。

同福原愛散咗

錦織圭贏波後,會同佢偶像費達拿爭冠,故事發展比《足球小將》更加戲劇性。喺日本早有「網球王子」美譽嘅錦織圭,除咗好波之外,戀情亦好受矚目,佢喺08年北京奧運,同年長兩歲嘅日本乒乓球女將、「搪瓷娃娃」福原愛邂逅,並展開姊弟戀,不過兩人已經散咗,錦織圭反而愈戰愈勇,莫非化悲憤為力量?