開咗賽至改制、玩咩！

本地波來季大搞超級聯賽，董事會近期密密傾，不過波總有件事係必須要做，就係避免喺比賽中途更改賽例，因為咁做只會令人覺得唔專業同兒戲。

以最近舉行嘅銀牌淘汰賽為例，由於賽事關乎亞協盃資格，所以改玩主客制，將爆冷符碌嘅可能性降低，提高奪標球隊嘅認受性。賽事喺十月初開波，踢完兩場初賽後，甲組會突然提出修章改例，將本來次回合一旦要加時，加時期間都照計作客入球優惠嘅賽制，改為唔計喎，仲得到董事會通過添！甲組會話加時期間設有作客入球優惠，或會造成不公平，原因係編配主客場先後次序，係視乎場地供應而安排，相當被動喎。甲組會代表覺得賽制唔公平，提出嚟討論吓都好平常，但今屆銀牌已在進行中，若然修例，應該係等下屆，今屆照番現有規例進行至啱。