「愛鯊情意結」令姚明出錢出力保育瀕臨絕種的鯊魚，其實體壇有不少星級運動員都與動物發展寵物情緣。狗狗是人類最忠誠的朋友，所以網球「一哥」祖高域、前曼聯球星堅尼及F1車神舒麥加都是星級狗主，其他另類寵物則有泰臣養白鴿、板球天王簡漢收養老虎等，星級選手還當正牠們是屋企人般呵護照顧呢！
當今最紅網球巨星毫無疑問是「一哥」祖高域，連他的愛犬、法國鬈毛獅子狗Pierre都新聞多多！祖高域不但為狗狗開Twitter，人狗更是秤不離砣，糖黐豆程度媲美與女友Jelena，一齊游水、拍廣告，鬈毛狗實行做埋「電燈膽」。
祖高域更曾因愛犬被禁入境英國，鬧得滿城風雨，幾乎誇張到要打官司。今年溫布頓Pierre被拒絕入境，祖高域多次向賽會及英國海關部門求救不果，搞到心情忐忑不安，遂借傳媒朋友發聲，懇求有關部門網開一面。博彩公司立博即時開盤受注，Pierre最終能入境有6倍，更有球迷擔心祖高域為鬈毛狗牽腸掛肚而險失溫布頓。儘管最終愛犬未能陪伴在側，但得到友人瘋傳Pierre新相上網解「相思」之苦下，祖高域最終捧走溫布頓，賽後他旋即帶Pierre到地中海勝地里維耶拉度假，享受陽光與海灘，並攜牠一起拍攝名錶廣告，見少一日都唔得。