韋迪占士入球騷止波癮
「熱火三巨頭」於香港時間周日早上，搞咗場慈善明星賽，畀球迷止吓波癮，結果兩隊合演入球騷冧盡球迷，仲要打埋加時，等球迷汁都撈埋，結果「韋迪隊」以141比140擊敗「勒邦占士隊」，現場球迷固然盡興而歸，全球NBA迷更搞到網絡大塞車！
今場賽事於佛羅里達國際大學主場館舉行，「韋迪隊」除韋迪外，仲擁有紐約人兩大球星史杜迪米亞及安東尼，另外基斯保羅亦在陣，而「勒邦占士隊」則有保殊同杜蘭特，兩隊加埋共有9名NBA全明星隊員，由於座位僅4千個，球迷要冒雨輪候四小時，門票短短開售兩小時內就沽清。
門票炒到2,500美元
本來呢場波嘅門票價格訂喺100美元，但由於反應熱烈，加上係慈善賽性質，故最終價格加至1,000美元，而黃牛飛更炒高至2,500美元，可見球迷真係非常餓波，買唔到飛嘅球迷都上網睇直播，搞到網絡大塞車。
班NBA球星亦相當識做，除咗打埋加時，等班球迷可以睇耐啲，現場仲不斷派發禮物，由於賽事屬慈善性質，球員都一呼百應，好似基斯保羅，因為有其他活動在身，開賽前90分鐘先乘飛機趕到現場，不過佢同安東尼喺比賽時都觸傷舊患，希望唔好因為做慈善而受傷啦！
本報綜合報道