有得睇明星賽啦！縱然NBA停擺未解決，今季都未知打唔打得成，幸好有良心嘅「熱火三巨頭」為答謝球迷兼做慈善，專登在香港時間周日（美國時間周六晚上7時）搞咗場慈善明星賽，仲請來安東尼同基斯保羅等球星壓陣，陣容拍得住真貨明星賽。此外還有網站作全球直播，餓波嘅香港波迷都可以嘗試上網睇波止渴，但預計會有數百萬球迷湧上網睇直播，隨時搞到網站癱瘓。
NBA停擺期間，球員除努力「轉工」外，亦有不少球星參與大大小小表演賽去幫補家計，但若論含金量，肯定及唔上今次「南佛羅里達經典明星賽」咁豪華。有份主辦嘅「熱火三巨頭」今次會分道揚鑣，「大帝」勒邦占士與保殊會聯同杜蘭特等球星代表Nike隊出戰，而韋迪就聯手安東尼及基斯保羅，代表Jordan Brand抗衡，今次賽事收益都會捐畀慈善機構。
今場賽事將在佛羅里達國際大學舉行，但由於場館只得約五千座位，所以門票在短短兩小時就售罄，幸好邁阿密電視台已預備頻道直播賽事，而CBSMiami.com更加會進行網上直播，讓全球球迷都有機會欣賞今場明星賽。不過，網迷能否順利睇直播仍屬未知數，事關上周舉行嘅基斯保羅慈善賽，網上直播點擊率多達110萬之多，今場陣容更加豪華，保守估計至少有數百萬球迷上線睇波，肯定逼爆網站。
另方面，占士在停擺期亦不愁冇收入，事關佢代言品牌為佢推出一系Lebron James X Nike Sportwear秋冬服飾，當中包括潮人秋冬必備單品M65軍褸，以及Destroyer Jacket，將「大帝」味道融入潮服，顯露優閒時尚。