好多教練都鍾意做講波佬，好似前火箭教練雲根迪咁，佢有波唔教，寧願講波好過，因為佢話教波嘅壓力實在太大，吃力不討好，講波反而令佢可以重新喜歡籃球。
雲根迪成名於紐約人，由九六年教到○一年，○三年開始教火箭，可惜火箭成績一直未有突破，佢更受到千夫所指，一怒之下索性轉做講波佬。雲根迪話：「我好享受評述員嘅工作，如果有一日我教番波嘅話，我寧願做助教，因為做主教練嘅壓力太大喇！」