「玻璃腳」列納球員生涯屢遭傷患打擊，三十二歲就掛靴，好彩佢有一副靚仔臉孔，因而進軍公仔箱，成為講波界師奶殺手，依家穩坐天空體育台柱地位，估計年薪逾十萬鎊（約121萬港元）。其實早於○四年，列納仲効力緊熱刺時，已經為英國廣播公司評述歐國盃，結果憑靚仔小生形象一炮而紅，仲吸引一班非球迷嘅女觀眾，即時成為講波界大紅人。
翌年列納乾脆退役，全身投入傳媒工作，除咗擔任評述員及主持節目之外，仲同老婆及前隊友舒活創辦足球月刊《Icon Magazine》，估計依家有二萬五千名訂戶，似乎想做傳媒大亨。