本港公營服務機構收費設有可加可減機制，其實本地波門票收費一樣係可加可減，今季新升班嘅深水埗做咗個實驗，佢哋將波飛由六十蚊大幅減至廿蚊，結果喺港甲嘅入座率排名榮登榜首，成功營造熱鬧氣氛。
本地波收六十蚊只係十幾年來做落嘅慣例，並非鐵價不二，自從推行主客制以來，賽事盈虧要由主隊孭數，包括畀場租、行政費同抽佣，仲有票房賺蝕，票價亦由主隊自行決定，遇到好戲碼嘅賽事，可以照收六十蚊，戲碼稍弱嘅就減價益街坊。
深水埗係甲組新軍，以奧運腳為骨幹，戰鬥力暫時唔及幾支老牌球會，如果將球隊實力與票價掛鈎，佢哋減價收廿蚊，門票收費已經反映球隊水平，成功吸引街坊球迷支持，做法正確。
雖然大家冇講出口，但其實每個球迷心裏面都有把尺，邊場波值得畀六十蚊，邊隊波hea踢唔抵睇，呃唔到人，因此本地波亦不妨引入門票可加可減機制，每場票價按戲碼彈性處理，話唔定可以好似深水埗咁，推高入座率。
以此推論，本地波大可以分成三種票價，最好戲碼賽事收六十蚊，中等戲碼賽事收四十蚊，戲碼最弱嘅賽事就收廿蚊，至於邊場係好戲碼，邊啲波預咗冇人睇，大家搞咗咁多年波，自然會有專業判斷o架啦！