本地波主客制搞咗幾季，硬係覺得唔多到肉，直至有人提議將銀牌改玩主客制，呢個改動直情中晒Point啦！就好似大家睇開嘅歐聯同歐霸咁，16強淘汰賽階段採用主客淘汰賽，就非常刺激，本地波開始玩呢一套，係進步嘅表現。
銀牌淘汰賽係本地波上半季最重要錦標，因為冠軍可取得亞協盃參賽資格，不過銀牌多年來都玩單淘汰制，波男認為有修改嘅必要。
幾十年前嘅銀牌，如果打和係會重賽，同現時打和要加時及互射12碼，務求一場搞掂晒有所分別，96至97年度球季亦試過改踢雙淘汰制，結果南華同快譯通踢咗兩場決賽，可惜係「只此一次」。
本地波近年引入地區球隊，各甲組會亦以各區場地作主場，有晒搞主客淘汰制嘅條件，只要再同各區場地協商，解決場地使用量增加嘅問題就掂啦。既然銀牌冠軍要代表香港出戰亞協盃，改踢主客淘汰制就最適合，因為亞協盃進入8強階段，就會採取主客淘汰制，兩回合打和要先計作客入球，銀牌改制，香港球隊亦可提早熟習呢個玩法，如果想再做足啲，索性連外援名額都跟埋亞協盃例嘅3+1制，大家入場睇波就當正係亞協盃預賽咁睇，仲好feel啦！
波男