香港隊今年七月喺世盃黯然出局後近期重組，準備參加高雄嘅「龍騰盃」，令人振奮嘅係，各大球會終於肯放主力球員出嚟參加港隊練習，組成近年最齊整人腳，希望踢好今次比賽，為港爭光。
自從○九年東亞運奪金至今年七月世盃出局，港隊年半以來出現大問題，個別球會嘅球員只到不操甚至缺席，但到有比賽時就繼續正選上陣，咁搞法港隊不但踢得唔好，更引來堅持出席練波但結果冇得落場嘅球員有所不滿，兩邊都唔討好。
港隊喺七月嘅世盃外圍賽遇上沙特阿拉伯，結果兩回合夾埋捧咗八隻蛋，輸鑊甘出局，香港同沙特係咪差咁遠？可能係，不過喺好多球迷心目中，港隊遇上呢個檔次嘅對手，輸係預咗，只希望輸得有尊嚴，散場後可以挺起胸膛離開，可惜呢次就做唔到咯。
環顧世界各地，球員都以入選國家隊為榮，為爭一席上陣機會搏到盡，而獲國家隊或代表隊徵召嘅球員亦會身價上升，其實早年嘅香港球圈都係咁運作，每個球員嘅晉升階梯，都係先由青年軍、預備組起步，再做甲組後備，經過一段時間磨練成為經常正選，最醒嗰班先至入選代表隊。
近一年半載港隊確係迷失咗，今期港隊總算重回正軌，希望港足將士們珍惜機會認真備戰，咪再令球迷失望。
波男