中國人話：重賞之下必有勇夫，點知喺國足身上竟然唔Work，球隊日前喺世盃亞洲區二十強賽作客約旦，重賞之下仍然輸波而回，依家出線形勢麻麻，下月十一日主場對伊拉克係生死戰，非勝不可。
國足對約旦前，中國足協懸賞出線獎金一千五百萬人仔，折合港紙係一千八百幾萬，呢個金額無疑係幾令人振奮，但偏偏刺激唔到中國球員士氣，令球迷大感無奈。
回顧十年前國足歷史性打入世盃決賽周，中國足協嘅獎金只係五百萬人仔，係今次獎金嘅三分之一，但如果計埋中國十年來嘅經濟增長、物價、生活指數同通脹，今屆獎金大升三倍其實都唔係好多啫，道理好簡單，大家諗吓內地十年前嘅樓價係幾多，依家樓價係幾多，咁就好易明白。千幾萬出線獎金，若果真係出到線，廿幾人分，買層樓都未夠找數。
再望吓近幾年落嚟香港嘅自由行，掃名牌買豪宅要幾豪有幾豪，全部現兜兜，掃幾個豪宅單位隨時億億聲，依家世盃出線獎金得嗰千幾萬，唔夠買豪宅單位內嘅一個廁所。
其實以中國現今嘅經濟實力，求其搵個富豪出嚟畀獎金都隨時過億，例如今季中超恒大，據講首年班費已經係幾個億嘞，中國足協定嘅獎金實在到喉唔到肺，想國足踢得好？添啲啦！