歐國盃及世界盃雙料盟主西班牙近期傳出內訌，巴塞同皇馬兩幫球員之間因為相互間嘅競爭，搞到關係瀕臨破裂，呢種敵對情緒由球會伸延到國家隊，雖然教練迪保斯基做咗好多嘢想補鑊，但只要巴塞同皇馬一日仲喺西甲同歐聯戰場競爭，呢啲積怨好難完全消除，好似計時炸彈咁，隨時又爆過。
現時嘅情況係巴塞佔去國家隊近大半常規正選席位，手握話事權。皇馬近年太過重用星級外援，陣中主力國腳其實只得卡斯拿斯、沙治奧拉莫斯同沙比阿朗素三個咁大把，可謂勢孤力弱。睇番上場西班牙反勝智利嗰場友賽，波男好明顯覺得兩幫人心病未除，佢哋極少互相交波，大部分時間都係巴塞嗰六、七個喺度踢，即係西班牙七人隊對人哋十一個，雖然最終贏波嘅多數都係西班牙，但係感覺有啲怪怪地。
由於巴塞踢法自成一個體系，外人好難融入，佢哋嘅踢法亦無從複製，沙維就係沙維，小白就係小白，皇馬三子喺國家隊變咗「多舊魚」，與其係咁，如果我係迪保斯基，不如大膽啲認真考慮吓棄用皇馬三子，反正老實講，西班牙大把好球員，三子係咪真係咁無可代替呢？波男認為唔係囉，域陀華迪斯近年水準根本已在卡斯拿斯之上，沙治奧拉莫斯唔係認真好波，而且又茅又惹火，不用也罷，沙比阿朗素只係一名有遠射腳頭嘅防中，論重要性同沙維小白法比仔不能相提並論。踢波最緊要講氣氛同士氣，如果只係撤換三幾個球員就可以穩住軍心，完全值得咁做！
波男