波男身邊唔少老友都話「劉翔好唔抵！」佢哋都話睇住翔哥喺世界田徑錦標賽110米欄決賽，如果唔係跑喺旁邊個「蘿蔔Ｃ」撞佢兩嘢，睇佢後上個勢要重奪世界冠軍一啲都唔難。不過，波男就唔係咁諗，仲認為咁嘅結果係對劉翔係最好！
誠如翔哥喺賽後話呢個世界賽只係一場遊戲……冇錯，對佢嚟講世錦賽冠軍又算啲乜？睇番呢兩屆個冠軍，乜鬼巴巴多斯跑手柏夫維特，同埋美國嘅李察遜，講真就要唱番首蘇永康嘅《那誰》嚟形容佢哋，咁就證明世錦賽係何等一回事！
喺翔哥心中，相信冇嘢比起下年塊倫敦奧運金牌更重要。今次輸咗，唔使孭住「世界冠軍」個朵去參加奧運，壓力少咗好多！再加上翔哥今次喺大家面前，展示出佢係有能力攞到冠軍，但就係唔好彩先攞唔到……嘩！咁嘅劇情一面可以提升各大廣告商對佢重奪奧運金牌嘅信心，又能夠增加幾分悲情。
最勁揪嘅係賽後記者會上，翔哥教練孫海平喪插「蘿蔔Ｃ」係衰人，又話佢有心搞佢個徒弟，成個「大反派」形象出晒嚟；相反，翔哥對於呢次「肢體碰撞」事件就表現出好大量，話呢啲嘢周時都有，表現出大俠嘅胸襟！嘩！呢兩對「契父子」咁樣一唱一和，睇嚟由呢刻開始直到下年奧運開跑，翔哥嘅身價真係「通脹來了」！
波男