鳳凰計劃上場，9月3日開鑼嘅2011至2012年度本地甲組足球聯賽，被視為「末代港甲」，將會銜接明年創辦嘅「全職業聯賽」。雖則話係「過渡聯賽」，但落得場踢波邊肯認衰？收費電視播波、旺角場10月重開都令本地波氣氛加熱，各隊積極組軍下，今季出現Big5爭霸亂局。抖暑結束，本地波支持者速速歸位，追睇我哋嘅港甲「開鑼特輯」，準備迎接本地球季來臨啦！
號稱「港版巴塞」嘅傑志上季兩循環KO南華，壓倒對方贏得聯賽冠軍，今季首要目標係衞冕聯賽，但下半季分心應付亞協盃，以球隊現有人腳未知頂唔頂得住。
唔少分析話，傑志其實只係專恰南華，遇上其他對手就冇乜把握，特別係防守嚴密嘅球隊，就有機會搞掂傑志，呢件事你知我知，傑志教練甘巴爾都知，睇吓佢哋今季喺破密集方面有乜符fit嘞。
代表人物：盧比度
主場：將軍澳運動場
教練：甘巴爾
主要新加盟球員：米高、羅志焜、黃洋
主要離隊球員：鄭少偉、蘇來強
上季簽入畢特及基士文而國際知名嘅南華，在三大戰線失陷，先失銀牌、再失聯賽，最後喺亞協盃分組賽出局，但畢竟球會實力雄厚及支持者眾，上季失意必令球員知恥近乎勇，新球季力圖盡攬四大錦標挽回面子。
南華上季失利嘅根源係去年底聯賽不敵傑志後，教練金判坤稱病離隊而起。盡攬港腳嘅「少林寺」今季並冇刻意擴軍，只請來前斯洛伐克主帥高世安，鋒線加入高大中鋒戴倫。
高世安強調紀律治軍，今年初佢短暫執教江蘇舜天，因戰績不佳離隊，如今執教港甲班霸，點樣同高層及教練團溝通，將左右球隊命運。
代表人物：陳肇麒
主場：香港大球場
教練：高世安
主要加盟球員：中島法蘭、戴倫
主要離隊球員：畢特、基士文
晨曦今季與中甲廣東日之泉結盟為兄弟球會，由「日之泉」贊助，又獲影星成龍（JC）冠名，目標係「乜都想要」，既要冠軍，又要青訓。
晨曦上季處於轉型期，教頭列卡度率領新陣容艱苦作戰一度要護級，但下半季踢出九場不敗升上聯賽第四，足見列卡度嘅功力。
雖然現時嘅晨曦，與05年全盛時期嘅「五冠王」相比仲有距離，但球隊總算重返爭標行列，有實力同南華、傑志拗吓手瓜。
代表人物：高尼路
主場：旺角大球場
教練：列卡度
主要新加盟球員：米路雲洛域、鄭少偉
主要離隊球員：劉志強、謝敏榮、巢鵬飛
公民將以銀牌冠軍身份進軍今屆亞協盃，因此今季組軍頗為積極，一早斟掂幾位目標球員，包括巴西嘅阿馬利及日本嘅中村祐人兩位前鋒，增加入波本錢。
公民成日畀敵對球迷鬧佢哋用「殺傷戰術」，但踢法硬朗其實冇做錯，佢哋呢種打法，喺聯賽未必有用，但喺淘汰賽同亞協盃都可以大派用場，值得期待。
代表人物：迪天奴
主場：旺角大球場
教練：貝可泓
主要新加盟球員：阿馬利、中村祐人
主要離隊球員：鞠盈智
天水圍飛馬雖擁有強勁陣容，但一直只被視為「南華B隊」，要打破外間閒言閒語，飛馬就要「的」起心肝認認真真踢好波至得。
由於上季多場賽事先贏後輸，飛馬今季陣容大換血，新陣容喺季前熱身賽亦似模似樣，今季唔使打亞協盃專心打本地波，成績應該唔會太差。
代表人物：伊達
主場：元朗大球場
教練：陳曉明
主要新加盟球員：卡夫、盧卡斯、鞠盈智
主要離隊球員：李瀚灝、卓卓
9月3日（周六） 傑志Vs日之泉JC晨曦 將軍澳運動場 5:00pm
9月9日（周五） 天水園飛馬Vs標準流浪 元朗大球場 8:00pm
9月10日（周六） 深水埗Vs公民 深水埗運動場 2:30pm
9月10日（周六）南華Vs屯門 香港大球場 5:30pm
9月11日（周日） 和富大埔Vs港菁 大埔運動場 2:30pm