陳嘉桓打女守龍門

今期「球愛敢死隊」輪到有十多年守門經驗嘅樂比仔上陣，接受挑戰嘅係「小師妹」陳嘉桓（Rose）。「小師妹」係新一代打女，由電影《葉問前傳》到最近嘅《競雄女俠‧秋瑾》都打到飛起，09年仲攞過香港公開武術錦標賽銀牌添，淨係聽呢啲來頭，都知道樂比仔今次嘅任務係幾咁艱巨，唔知功夫同足球，Crossover又有冇得諗呢？

小師妹竟係曼聯躉

樂比仔初次見「小師妹」，已經知道佢係識波之人，因為佢一睇曼聯、巴塞隆拿同皇家馬德里波衫，就知道邊件打邊件，仲識得分主場同作客添！見佢由始至終對曼聯波衫愛不釋手，原來又係曼聯死硬派fans！佢仲大讚植髮後嘅朗尼好靚仔，咁肉麻嘅說話都講得出？你好嘢！作為車路士球迷嘅樂比仔，決定唔再憐香惜玉，考驗吓佢嘅真功夫先！

「小師妹」打功夫就叻，足球又踢過未呢？Rose話細個最怕就係球類活動，因為驚仆親，但自從學咗功夫之後，身體好咗，乜嘢運動都想嘗試，既然係咁，樂比仔今日就教佢守龍門，睇吓佢可唔可以好似《少林足球》嘅阿梅咁，用佢生平所學嘅武術救到樂比仔嘅猛虎射球先！樂比仔先試吓佢下三路嘅功夫，「小師妹」話完全未驚過，因為練功夫都要紮馬，下盤最緊要穩，所以佢身形雖然稍高，但救地波一樣冇問題，有冇咁堅呀？樂比仔射過地波果然難唔倒佢。嘩！仲得戚到用隻腳踩定個波添，有冇咁醒呀？因住踩波車喎！

放大圖片	放大圖片	放大圖片

港女足前途靠晒佢

咁上三路功夫又如何呢？「小師妹」果然係練武之人，兵來將擋，幾下手勢就救晒啲波，仲識得打手槌。喂！因住我部相機先得o架！

好喇，經過幾回合嘅測試，「小師妹」已成功喺武鬥呢個回合Pass，樂比仔亦順利收佢為入室弟子，打算日後培訓佢做香港女足守門員嘅接班人，咁計落我咪係葉問徒孫？徒弟，你要努力呀，香港女足嘅前途靠晒你嘞！

圖：司徒子文