米蘭雙雄抵京fans先開波
「米蘭雙雄」已經飛抵北京準備周六爭意大利超級盃，國際米蘭已經急不及待進行首課操練，期間有一名球迷唔識死，着住件AC波衫喺觀眾席「踩場」，惹得國米球迷情緒相當激動，有數名激進球迷走到嗰位AC球迷身邊扯爛佢件衫，「AC友」即時彈起身反抗，幾名球迷對罵演變成互毆場面，及後要勞煩在場公安護送「AC友」離場。
AC狂迷機場發難
而較早時間AC大軍抵達機場時，有球迷突破圍欄試圖衝向AC球員，令到森保達、尼斯達、耶比斯及加度素等人都嚇一驚，好彩有六名機場保安將佢壓喺地上，然後拖離開現場，身邊球迷懶理事件發生，繼續大叫「米蘭，米蘭」。