費托露點入波冧爆fans

新星麥伊治蘭閃電破門

車路士主帥保亞斯於決賽排出怪陣，派出安歷卡擔正攻堅，史杜列治及馬隆達於兩側支援，不過，眾星畀小將麥伊治蘭搶晒風頭，呢位超新星開賽不足一分鐘已極速士哥，表現搶鏡，新季大有機會上位。

王子第一腳掂波即入

阿士東維拉換邊後調入希斯基加強攻力，但效果平平，戰至五十四分鐘，人氣王費蘭度托利斯於場邊準備上陣竟罕有露點，現場球迷即時起哄，唔少女fans發出高分貝尖叫。踢到五十七分鐘，托利斯千呼萬喚始出來，同杜奧巴齊齊落場，加埋安歷卡組成進攻鐵三角，全場車迷即時嘈到拆天。

好戲尚在後頭，兩分鐘後馬隆達遠射，托利斯門前彈入，第一腳掂波即建功，球迷尖叫指數爆晒燈，氣氛進入今屆賽事最高峰，「王子」士哥後表現興奮，同拍檔杜奧巴擊掌兼攬頭攬頸，其後此子施射被基雲救出，未能梅開二度，但已引來全場球迷再次狂呼，最終球隊以二比○戰勝維拉捧盃。保亞斯取得上任後首個冠軍，大軍捧盃後無暇留港慶祝，昨晚已乘夜機返國。而維拉今日仍會出席活動，晚上將與布力般流浪離港。

巴克萊亞洲錦標賽決賽賽日入場人數為38,911，票房收入達到10,448,530港元，計同兩個賽日，合共有72,878人入場觀戰，總票房收入為19,812,080港元。英超旋風席捲本港一星期，球星所到之處人山人海，直接帶旺中環及尖沙咀一帶，隨住幾支球隊離港，追星之旅亦告一段落。

球迷高舉費托波衫，但點解利物浦嚟嘅？	放大圖片	費托賽後同西班牙鄉里多嘢傾，並主動將波衫送畀傑志外援羅沙度（右）。
新星麥伊治蘭（左）閃電開紀錄，新球季大把世界。	林柏特甚受球迷歡迎。