阿仙奴小學員飛倫敦兵訓
阿仙奴（香港）足球學校趁暑期安排學員到英國接受特訓，十三名「小兵」日前喺教練高志超及吳穎琴帶領下抵達倫敦，將會在當地進行高度訓練及比賽。學員去到倫敦之後拿起相機到處觀光，期間更巧遇準備出戰酋長盃嘅小保加職員及球員，兩地人齊齊感受英國文化及足球氣息。
一眾阿仙奴小將以旋風式橫掃倫敦各大景點，仲話能夠到塔橋、大笨鐘、白金漢宮等地參觀令佢哋大開眼界。經過遊歷之後，「小兵」就會正式進入訓練營，進行六日五夜嘅集訓。喺阿仙奴英國總校教練指導之下，來自世界各地阿仙奴足球學校嘅學生將會一同學習及成長。
雲格吊高法比仔嚟賣
另外阿仙奴領隊雲格已承認法比加斯將會被出售。雲格話近期覺得法比加斯個心已經離開「兵工廠」，雙方再為去留問題糾纏落去都冇意思。而雲格補充絕唔會賤賣法比加斯，有興趣收購球隊必須提出一份令三方面都感到滿意嘅方案。