卡勞掃中藥 讚掂過軍醫
沙洛文卡勞除咗溝女，原來掃貨都好有心得，竟然連膏藥都買埋，仲話中藥仲掂過球會軍醫喎，果然識貨！
杜奧巴率領法語系老友於中環shopping，團友包括安歷卡、馬隆達及沙洛文卡勞，潮佬杜奧巴一向鍾情影音產品，掃走咗一部iPod Touch同埋兩個earphone，埋單計數使咗超過六千蚊。
之後入咗間橙色連鎖個人護理產品店，期間小記同沙洛文卡勞傾咗幾句，佢話自己條腰赤赤痛，所以想買啲膏藥，唔舒服點解唔搵球會軍醫按兩嘢呢？卡勞話鍾意中國嘢，覺得中藥特別好，冇乜睇價錢就買晒一大堆貨品。
大疊$500掃LV
四人之後走入LV，型佬杜奧巴起勢咁試鞋，沙洛文卡勞冇睇價錢係咁買，總共用咗超過兩萬蚊，佢埋單嗰陣拎一疊五百蚊出嚟，成個大豪客咁！