書展大熱，今年估計入場人數有望突破百萬。雖然書種齊備，但香港體育人欠缺作品面世，真係失禮啲噃！近幾年書展，李麗珊、蘇樺偉、李健和、陳肇麒，吳偉超都有作品推出，是否親自執筆並唔重要，最緊要係書中主角係體育人。據出版界老友透露，上述幾本雖非好好賣，但銷情亦未算冷清，總算有得做。
不過，波男前日去書展走咗一轉，行勻都唔見香港體壇有新書出，淨係見到內地排球公主趙蕊蕊嘅新作，照計香港體壇確實人好多，但至弊係受歡迎嘅星唔夠，自然唔容易吸引出版商，試問蝕本生意邊個肯做？
香港運動明星，到依家仍然係講緊黃金寶、陳敬然、乒乓孖寶同傅家俊，新一輩運動員睇唔出有成為明星潛質，情況真係幾令人擔憂。
提起呢個問題，政府投放資源少，已經講到口臭，部分體育界領導人老土心態亦係一大問題。波男早兩年曾同一位港協高層食飯，提起商業贊助運動員，搞多啲包裝時，佢竟然話：「運動員唔應該搞咁多其他事，專心操練同比賽就得喇！」依其邏輯，林丹一年拍咁多廣告，咪冇得做冠軍好耐喇！再抱如此心態，香港體育想好都難。
波男