布力般浸冰桶下火
布力般流浪球星「食波餅」食滯咗？本報尋日獨家踢爆布力般球員灣仔夜蒲攬女，唔知係咪畀昨日到埗嘅領隊堅恩捉去照肺，成班球員尋日練波個個面燶燶，門將羅賓遜更失晒魂狂甩手。班球星操完後更即席上演「真人騷」，除剩條底褲沖凍水涼散熱！
踢拖步兵——便服冇隊徽
雖然之前一晚玩到阿媽都唔認得，不過尋日朝早九點幾開始，一班球星已分批外出，或者係唔想再次「影衰」球隊，佢哋出街所着嘅藍黑橫間Polo恤都冇布力般Logo，多數都係踢住拖鞋輕裝出擊，而且唔搭車選擇做「步兵」，不過眾人返酒店嗰陣都兩手空空，認真忍到手。
黑面開操——門將狂甩手
領隊堅恩同隊長賴恩尼爾遜唔喺度，班球員無王管，兩人昨日歸隊即刻做嘢，原定六點喺港會場嘅操練突然提早一小時開始，球員就個個黑口黑面，出名「牛油手」嘅羅賓遜更蝦碌頻頻，一啲好基本嘅接波都甩手甩腳。
港男上身——剝剩條底褲
由於天氣炎熱，布力般職員就預備咗裝滿凍水嘅「臨時浴缸」，畀佢哋即時消暑解熱，班球員亦老實唔客氣，操完就剝衫剝褲跳入去降溫，懶理其他人睇住佢哋「表演」，有球員更加唔介意除到得番條底褲，唔知可唔可以幫佢哋降啲「慾火」呢？
