日本女足剛捧走世界盃，老早已經衝出亞洲嘅日本男足亦有大批球員向歐洲進駐，最新數字係新一季德甲嘅日本外援多達九人，睇見鄰國咁風光，中港男女足真係口水都流埋。
近期唔少評論都以日本女足成功，用嚟狂踩中港足運嘅失敗，而新球季德甲有九名日本外援，中國僅得邵佳一喺德國乙組搵食，相比下中國足運似乎差咗幾條街。
日本足運揚威世界，其實中國女足十二年前都試過打入世盃決賽，可見歐美同亞洲女足差距唔大，而今次日本女足喺開賽前嘅奪標賠率係十五倍嘅第四熱門，佢哋捧盃只係半冷跑出，唔算係大冷門。
日本男足近年紛紛到德甲効力，新球季竟然多達九人，有德甲專家指出，此現象為之「香川真司效應」，日本球員喺歐洲只屬「廉價勞工」，幾十萬歐元有交易，但係早前曼聯竟然開價二千萬鎊天價向多蒙特收購香川真司，可見好球員不論國籍都有價有市。
日本職業聯賽經過十幾年發展，現時到達樽頸關口，今年再受地震天災影響，唔少球會為咗經濟考慮，都願意將主力高價割愛，因此今季宇佐美貴史同大津祐樹都到德甲掘金。
中國球員外流歐洲得唔得？只能講句唔係時候，一來技術未夠，二來今季中超似乎有復甦迹象，如果中超搞得起，經濟效益唔講得笑，球員水漲船高，又何需飄洋過海咁頻撲呢？
波男