蔡芳裕37歲不言退
雖然唔少體育運動都係力量與爆發力嘅比併，但亦有好多年近四十嘅老將仍老而彌堅！日前協助永倫登上Playoffs總冠軍嘅三十七歲中鋒蔡芳裕，除咗喺板櫈上以助教身份不斷獻計外，更後備上陣建奇功；難怪呢位傳奇球星談及退休一事時就話：「起碼都要同吳柱業（四十一歲退休）打成平手啦！」
喺上年廣州亞運，黃金寶就以三十七歲之齡奪得金牌，證明只要有團火，一樣可以攞冠軍。已征戰甲一籃壇十八載嘅蔡芳裕，上星期五喺Playoffs嘅Game 5第二節上陣，隨即轟入十分把僵局拉開，最終成就永倫擊敗南華捧盃！對於自己狀態咁弗，阿裕表明未想退休：「我哋曾經喺Game 3同Game 4輸畀南華，當時懷疑過自己係唔係冇能力再打落去；結果Game 5一節內攞到十分，證明我仲未係時候退休，但一切都要睇球隊仲需唔需要我！」
打到41歲先退休
講起籃壇長青樹，阿裕就話唔可以唔提喺九七年稱霸亞洲冠軍球會盃嘅隊友吳柱業：「吳柱業的確係一個典範！其實作為籃球員，過咗三十三歲就會走下坡，但佢一直Keep得好好，當年打到四十一歲仍有良好狀態全因夠自律。我有樣嘢喺佢身上學到畢生受用，仲記得嗰陣時同佢出外比賽，無論夜晚練到凌晨一點先瞓，但佢都會喺朝早八點準時起身，再食早餐去跑步健身等。所以依家我都好想挑戰、甚至超越佢四十一歲退休嘅紀錄。」
圖、文：司徒子文