前晚世界盃外圍賽亞洲區首圈次回合，中華台北以三比二擊敗東南亞錦標賽冠軍馬來西亞，總比數打和四比四，僅輸作客入球出局，若非前飛馬主將陳柏良射失十二碼，可能歷史已改寫，但最令人驚訝嘅唔係戰果，而係入場人數竟然多達一萬五千人，打破二十年來紀錄，實在令號稱亞洲最早推動職業足球嘅香港感到汗顏！
一向被視為足球沙漠嘅台灣，近年致力發展足運，除去年主辦龍騰盃增加踢國際賽機會，仲搵到酷似奇洛李維斯嘅中法混血兒陳昌源為球隊効力，呢位比甲球星一到台灣已吸引到傳媒注視，廣收宣傳之效，香港係咪應該考慮吓，徵召有條件代表港隊嘅前德乙球員聶凌峰、千葉市原中場林馬菲及些路迪門將費利加入港隊呢？
香港將於月底出戰世界盃外圍賽次圈，對手係列卡特率領嘅沙特阿拉伯，先唔講兩隊實力差距幾大，樂比仔最擔心嘅反而係到時冇球迷入場，因為香港主場賽事同英超亞洲錦標賽撞期，為免踢爛個場失禮班英超球星，港隊賽事要移師至出名趕客嘅小西灣球場舉行，呢啲咪係亞洲國際城市嘅「好客之道」囉！
樂比仔當然明白香港球迷好現實，香港隊嘅吸引力根本難以同英超球星相提並論，但世界盃四年先一次，輸咗又要等四年，香港隊其他方面已比唔上人，如果連主場氣勢都輸畀人嘅話，香港足球真係冇得救，所以真心鍾意香港足球嘅朋友，記得喺日曆畫低今個月二十八日，到時一齊喺小西灣為港隊打氣！
樂比堅尼